दोन वर्षांपूर्वी, जेव्हा फेसबुकने व्हॉटसअॅप विकत घेतलं त्यावेळी व्हॉटसअॅपचा सीईओ Jan Koum याने म्हटलं होतं की “व्हॉटसअॅपमध्ये काहीही बदल केला जाणार नाही. ग्राहकांच्या गोपनीयतेच्या बाबतीत तर नक्कीच नाही. जर प्रमुख तत्व पाळली जाणार नसतील दोन कंपन्यामध्ये भागीदारीच झाली नसती”.
काळ बदलतो आणि व्हॉटसअॅपसुद्धा !
कालच व्हॉटसअॅपने नवी Privacy Policy (गोपनीयता धोरण) जाहीर केली असून यानुसार प्रत्येक व्हॉटसअॅप यूजरचा फोन क्रमांक फेसबुकसोबत शेअर केला जाणार आहे. यासाठी त्यांनी असं कारण दिलं आहे की ” फेसबुक जाहिराती आणि यूजर अनुभव सुधारण्यासाठी हे पाऊल उचलल आहे”. सध्यातरी हा तथाकथित “अनुभव” इतर कंपन्याना तुमच्याशी व्हॉटसअॅपवरुन संपर्क साधण्यासाठी खुले आमंत्रण दिल्यासारखे आहे!
याची चांगली उदाहरणं म्हणायची तर बँका अलर्ट सिस्टमसाठी व्हॉटसअॅपचा वापर करतील, रेल्वे/विमानसेवा ग्राहकांना स्टेटसबद्दल माहिती पुरवतील, मात्र वाईट उदाहरणं द्यायची तर अनेक मेसेज हे तुम्हाला जाहिराती प्रमाणे येऊन धडकतील.(ज्या तुम्हाला नको असताना स्वीकाराव्या लागतील!) सोबतच फेसबुकवरील जाहिराती तुमच्या फोन क्रमांकास सापेक्ष अशा असतील!
साहजिक आहे ज्यावेळी तुम्ही एखादी कंपनी १९ बिलियन डॉलर्सना खरेदी करता त्यातून काही फायद्याची अपेक्षा तर ठेवणारच, तेच फेसबुकच्या मनात असणार. म्हणूनच हा बदल पूर्णतः आर्थिक दृष्टीकोनातूनच करण्यात आला आहे हे लक्षात येतं. जर तुमचा फोन क्रमांक फेसबुकवर लिंक केलेला नसेल तर तो जाहिराती सुधारणेसाठी वापरला जाईल आणि जर आधीपासून तुम्ही फेसबुकवर क्रमांक जोडला असेल तर तुम्हाला अधिक योग्य फ्रेंड सुचवले जातील(!) आणि संबंधित जाहिराती दिसतील! व्हॉटसअॅपची याबाबत अधिकृत पोस्ट
तर आता पाहूया ही नवी पॉलिसी (गोपनीयता धोरण) काम कसे करेल आणि यामधून तुमचा फोन क्रमांक कसा टाळायचा …
जर समजा तुम्ही आधीच Agree क्लिक केलं आहे आणि आता तुम्हाला यातून बाहेर पडत तुमचा क्रमांक फेसबुकला द्यायचा नसेल तर तुमच्याकडे ३० दिवसांचा अवधी आहे. यामधून Opt Out (बाहेर पडण्यासाठी)
- व्हॉटसअॅपच्या Settings मध्ये जा
- त्यानंतर Account
- त्यानंतर Share My Account Info समोरील बरोबरची खूण काढा.
हे Uncheck/Unselect केल्यावर तुम्ही अधिकृतरीत्या फेसबुकच्या नव्या धोरणामधून बाहेर पडाल ज्याचं आम्ही समर्थन करतो कारण मोठ्या कंपन्या हल्ली ग्राहकांच्या गोपनीयतेवर अजिबातच लक्ष पुरवत नसून ग्राहकांच्या हक्कांच उल्लंघन होत असल्याची चर्चा काही गोपनीयतेसाठी काम करणार्‍या गटांमध्ये आहे. अशीही चर्चा आहे की जरी ह्या कंपन्या privacy चा कितीही दावा करत असल्या तरीही ग्राहकांचा सर्व डाटा त्यांच्याकडे आधीपासूनच असल्याची शक्यता जास्त आहे.
याआधीचा लेख : अँड्रॉइड नुगट 7.0 व्हर्जन अपडेट गूगल नेक्सससाठी उपलब्ध ! : जाणून घ्या अँड्रॉइडच्या नव्या व्हर्जनबद्दल सविस्तर लेखामध्ये …
